215 Pasahero, Na-stranded Dahil sa ‘Habagat’ — PCG

MANILA, Pilipinas — Mahigit 200 pasahero ang na-stranded dahil sa masamang panahon noong Linggo, Agosto 9, ayon sa Philippine Coast Guard (PCG).

Mula alas-4 ng umaga hanggang alas-8 ng umaga, iniulat ng PCG na 215 pasahero ang na-stranded sa mga apektadong pantalan sa ilalim ng Coast Guard Districts ng Western Visayas, Bicol, Southern Tagalog, at Central Visayas dulot ng Southwest monsoon na mas kilala bilang “habagat.”

Kasama rin sa mga naapektuhan ang 105 rolling cargoes at walong sasakyang pandagat na na-stranded sa 22 apektadong pantalan.

Ayon sa PCG, 19 na sasakyang pandagat, 10 motorbancas, anim na tugboats, at tatlong barges ang kumukuha ng kanlungan dahil sa umiiral na kondisyon ng panahon at dagat.

Batay sa forecast ng PAGASA noong Linggo, patuloy na magdadala ng ulan ang habagat sa ilang bahagi ng Luzon at Visayas.