Ama na Dati’y Gumagawa ng Bahay ng Iba, Ngayon ay Itinatayo na ang Kanilang Sariling Tahanan

Kinaantigan ng maraming netizens ang mga video ng isang ama na abala sa pagtatayo ng isang malaking bahay. Ang mga video na ito, na ibinahagi ng uploader na si “SIKINAH” sa TikTok, ay naglalaman ng kwento ng isang tatay na dati ay gumagawa at nagkukumpuni ng bahay ng ibang tao, ngunit ngayon ay nagtatayo na ng kanilang sariling tahanan. Sa mga nasabing video, makikita ang dedikasyon ng tatay sa kanyang proyekto, na tila naglalayon na makumpleto ang kanilang bahay.

Sa isang eksklusibong panayam ng Balita kay Shakeinah Ramirez, 28-anyos mula sa Barangay Santo Angel Central, Sta. Cruz, Laguna, ibinahagi niya ang kwento ng kanyang amang si Cesar Ramirez, 54-anyos, na nagsikap upang matugunan ang pangangailangan ng kanilang pamilya. Ayon kay Shakeinah, nagsimula ang kanyang ama bilang construction worker noong 1999, isang taon matapos siyang ipanganak. "Siguro, marahil, kailangan na ng extra budget nila Mama at Tatay dahil may pangalawa na kaming anak. Nagsimula siya sa pagpipintura at kalaunan ay natuto na sa iba pang aspeto ng construction. Sa dami ng kanilang nagawang bahay, marami na siyang natutunan," pahayag ni Ramirez.

Ibinahagi rin ni Shakeinah ang dahilan kung bakit siya naging mas determinado na simulan ang kanilang tahanan. "Noong binili namin ng ate ko ang lupa at nahawakan niya ang titulo na nakapangalan sa kanila ni Mama, sobrang saya nila. Sa wakas, mayroon na silang lupa na hindi nila nakuha noong nagsimula silang mag-asawa," kwento niya. Aniya, "Gabi-gabi, pinagmamasdan ng tatay ko ang titulo bago kami nagsimula ng construction. Noong nakita ko iyon, mas naging determinado ako sa pag-iipon para masimulan na ang pagpapatayo ng bahay."

Ipinakita ni Shakeinah ang kanyang paghanga sa kanyang ama, na inilarawan niya bilang isang "selfless" na tao. Ang kwento ng kanilang pamilya ay nagsisilbing inspirasyon sa marami, na nagpapakita ng halaga ng pagsisikap at determinasyon sa kabila ng mga hamon sa buhay. Sa kasalukuyan, patuloy ang kanilang pag-unlad at umaasa silang makumpleto ang kanilang tahanan sa lalong madaling panahon.