Anne Patricia Diaz at Alexie Caimoso Brooks, itinanghal na Reina Filipinas - MGI All Stars

Itinanghal na Reina Filipinas - MGI All Stars sina Anne Patricia Diaz mula sa Tondo, Manila at Alexie Caimoso Brooks mula sa Iloilo City sa kauna-unahang Reina Filipinas pageant na ginanap noong Biyernes ng gabi sa Newport Performing Arts Theater sa Pasay City. Ang mga sumusunod na kandidata ay itinanghal ding runners-up: Cleopatra Barrera mula sa Zambales (unang pwesto), Isabella Ortega mula sa Camarines Sur (ikalawang pwesto), Zeah Nestle Pala mula sa Mandaluyong (ikatlong pwesto), at Luisa Benavides mula sa Caloocan (ikaapat na pwesto).

Samantala, si Angelica Lopez mula sa Palawan ay itinanghal na Reina Filipinas - Grand International 2026. Siya ang magiging kinatawan ng Pilipinas sa darating na Miss Grand International. Si Anne at Alexie naman ay magiging kinatawan ng bansa sa ikalawang edisyon ng MGI All Stars pageant.

Sa unang Miss Grand International All Stars na ginanap noong Mayo ng taong ito, mayroon tayong limang kinatawan mula sa Pilipinas. Sila ay sina Gazini Ganados, Fuschia Anne Ravena, Alexia Nuñez, Imelda Schweighart, at Keylyn Trajano. Ang korona ay napanalunan ni Vanessa Pulgarin mula sa Colombia.

Ang Reina Filipinas ay inilunsad noong Hunyo sa ilalim ng pamumuno ni Jojo Bragais, ang nagtatag ng brand ng sapatos na kilala sa paggamit nito sa mga pangunahing lokal at internasyonal na pageant. Ang kauna-unahang edisyon ay nagtatampok ng kabuuang 21 kandidata na nakikipagtagisan para sa mga titulong Reina Filipinas - Grand International at Reina Filipinas - MGI All Stars. —Carby Rose Basina/CDC GMA News