Babaeng humiling ng apo sa kanyang mga anak, nagkaroon ng bagong sanggol na lalaki

Sa edad na 45, isang ginang ang pabirong humiling sa kanyang dalawang anak na dalaga na magka-boyfriend na upang siya ay magkaroon ng apo. Ngunit hindi niya inaasahan na isang bagong sanggol na lalaki ang darating sa kanyang buhay.

Ayon sa ulat ni Katrina Son sa programang "24 Oras Weekend," ibinahagi ni Heidi Espiritu-Dimacali na madalas niyang biruin ang kanyang mga anak na pumasok na sa mga relasyon. Ang panganay niyang anak ay 26 taong gulang at isang aeronautical engineer, habang ang kanyang 22 taong gulang na anak ay nag-aaral ng dentistry.

"Nang makita nila ang ultrasound, doon na sila nagulat," ani Heidi, na may higit dalawang dekadang agwat sa pagitan ng kanyang mga anak at sa kanilang bunso.

Itinuturing na high-risk ang pagbubuntis ni Heidi dahil sa kanyang edad. Sa ika-34 na linggo ng kanyang pagbubuntis, nakaramdam siya ng pananakit ng tiyan at inisip na manganganak na siya. Nakaranas din siya ng premature labor na nagresulta sa matinding sepsis. Sa kabila ng mga pagsubok, nailigtas ang sanggol at siya ay nakapanganak matapos ang 38 linggong pagbubuntis.

Ayon kay Heidi, hindi naging hadlang ang malaking agwat ng edad sa kanyang mga anak at sa kanilang bagong kapatid. Sa katunayan, nag-uunahan pa ang mga ito sa pag-aalaga sa kanilang bunso.

"Mas masaya ngayon kasi na-e-enjoy nila ang kanilang kapatid at excited silang umuwi, lalo na kapag hindi sila makauwi," dagdag niya. "Nag-aagawan sila kung sino ang unang kakarga at sino ang unang mag-aalaga." — Nika Roque/FRJ GMA News