Bangkay ng babae, natagpuang nakasiksik sa maleta sa isang kanal sa Taguig

Natagpuan ang isang bangkay ng babae na nakasiksik sa isang maleta na nagpapalutang-lutang sa isang kanal sa Barangay Tanyag, Taguig. Ayon sa ulat ni Jhomer Apresto sa 24 Oras Weekend, nagulantang ang mga residente nang matuklasan ang bangkay ng babae noong Biyernes ng umaga. Ang maleta ay nababalutan pa ng itim na plastic bag at nakita ito ng isang nangangalakal habang nakasabit sa mga hose ng tubig.

Dahil sa masangsang na amoy ng maleta, agad na humingi ng tulong ang nangangalakal sa barangay upang iahon ito sa tubig. Ang mga tanod ng barangay ang nagbukas ng maleta. Ayon kay Manny Compayan Albor, isang barangay tanod, nang binuksan nila ang maleta, nakita nila ang mga plastic bag at kumot na nakabalot sa katawan ng biktima. "Noong binuksan ko bandang itaas, nakita ko na ‘yung dito sa gilid, umatras ako, sabi ko tao. ‘Yung una kong pagbukas, mga plastic bag kulay itim. Tapos mga kumot, tapos plastic ulit, Tapos binalot pa siya ng sako sa parcel. Tapos nakalagay pa rin doon sa ilalim, plastic ulit. Kaya ang tagal-tagal ko talaga siyang binuksan," aniya.

Ayon sa barangay, hindi pa matukoy kung residente nila ang biktima. Sinabi ni Mel Enriquez, Deputy Chief ng Barangay Security Force, "Araw-araw, nagte-take ako ng blotter book, wala pong reported missing person." Sa kasalukuyan, nananatiling blangko ang pulisya sa pagkakakilanlan ng babae na tinatayang nasa edad 35 hanggang 40.

Lumabas sa inisyal na imbestigasyon ng pulisya na may tattoo ng three stars at isang araw sa kanang binti ng biktima, at may nakasulat na "Walter" sa pagitan nito. Ayon sa mga awtoridad, posibleng inanod lamang patungo sa Barangay Tanyag ang bangkay dahil sa malakas na ulan noong Huwebes ng gabi.

Patuloy ang pakikipag-ugnayan ng pulisya sa iba pang istasyon upang malaman kung mayroong mga nawawalang tao na tumutugma sa deskripsyon ng biktima. "We sounded the alarm sa other stations natin, sa nearby cities natin or other units, nag-alarm kaagad kami through our operation center," pahayag ni Police Colonel Julius Añonuevo, Chief ng Taguig City Police Station.

Hinihintay pa ng mga awtoridad ang resulta ng autopsy upang matukoy ang sanhi ng pagkamatay ng biktima.