Bata, hinalay umano ng mas matandang lalaki sa isang internet café sa Davao City

Arestado ang isang 33-anyos na lalaki matapos umanong halayin ang isang 15-anyos na lalaki sa loob ng isang internet café sa Agdao District, Davao City. Ayon sa ulat ni Jandi Esteban sa GMA Regional TV One Mindanao, naganap ang insidente habang naglalaro ang biktima ng computer games sa internet café na pag-aari ng suspek.

Sa mga paunang imbestigasyon, sinabi ng biktima na wala nang ibang tao sa loob ng shop nang samantalahin ng suspek ang pagkakataon. Hinawakan umano siya ng suspek sa maselang bahagi ng katawan at sapilitan siyang dinala sa isang kuwarto kung saan naganap ang panghahalay.

Matapos ang insidente, umuwi ang biktima at agad na nagsumbong sa kanyang lola. Ang lola naman ay nagbigay-alam sa ina ng menor de edad tungkol sa nangyari. Ayon sa ina, hindi na niya nakayanan ang galit nang malaman ang sinapit ng kanyang anak at agad na ipinagbigay-alam ang insidente sa mga pulis.

Nang dumating ang mga awtoridad, agad nilang inaresto ang suspek sa loob ng computer shop. Sa kanyang pahayag, sinabi ng ina ng biktima na inisip ng kanyang anak na wala na siyang magagawa habang siya ay inaabuso, kaya't hinayaan na lamang niya ang suspek na matapos ang kanyang ginagawa upang makaalis na siya at makapagsumbong.

Desidido ang ina ng biktima na kasuhan ang suspek upang makamit ang hustisya at maipakulong ito nang habambuhay. Sa kasalukuyan, nakadetine ang suspek at nahaharap sa kasong rape. Tumanggi siyang magbigay ng karagdagang pahayag sa mga imbestigador.