Buwan ng Setyembre, itinalaga bilang Bullying Awareness and Prevention Month ng Kamara

Inaprubahan ng Kamara ng mga Kinatawan ang isang panukalang batas na nagdedeklara sa buwan ng Setyembre bilang National Bullying Awareness and Prevention Month. Ang hakbang na ito ay naglalayong bigyang-diin ang tumitinding problema ng bullying, lalo na sa mga kabataan at mga estudyante sa loob ng mga paaralan.

Ayon kay House Speaker Faustino "Bojie" Dy III, mahalaga ang pagkakaroon ng ligtas na kapaligiran para sa mga bata sa kanilang pag-aaral. "Bawat bata ay nararapat na pumasok sa paaralan na may pakiramdam ng seguridad, respeto, at pagtanggap. Walang sinumang bata ang dapat matakot na pumasok sa eskwela dahil sa pang-aapi o pananakot," pahayag ni Dy.

Sa ilalim ng House Bill 10134, nakatuon ang batas sa pag-iwas sa pagdami ng mga kaso ng bullying at sa pagbibigay ng kaalaman sa publiko tungkol dito. Layunin din nitong protektahan ang mga bata mula sa anumang uri ng pang-aapi, na nagiging hadlang sa kanilang pag-unlad at pag-aaral.