Cai Cortez, matagumpay na nagtapos sa kanyang Political Science Degree matapos ang 20 taon

Natupad na ang matagal na pangarap ng character actress na si Cai Cortez, anak ng kilalang aktor na si Rez Cortez, nang siya ay makapagtapos ng kolehiyo. Sa kabila ng kanyang mga responsibilidad bilang isang aktres at solo parent, nagtagumpay siya sa pagkuha ng kanyang diploma.

Ibinahagi ni Cai ang kanyang graduation photos sa Instagram kamakailan, kung saan nagbigay siya ng emosyonal na mensahe ng pasasalamat sa kanyang mga magulang na naging malaking bahagi ng kanyang paglalakbay patungo sa pagtatapos.

Ayon kay Cai, ang kanyang Bachelor of Science in Political Science, major in Local Government Administration, ay 20 taon na pinaghirapan bago niya ito nakamit mula sa University of Makati (UMak).

Nagpasalamat din siya sa kanyang mga guro at sa kanyang matalik na kaibigan na si Tart Carlos, na tumulong sa kanya upang makapag-enroll sa nasabing programa. Ang kanyang kwento ay nagsisilbing inspirasyon sa marami na hindi hadlang ang mga pagsubok sa buhay upang makamit ang mga pangarap.