Castro: Dapat Iwasan ng Senator-Judge ang Pakikipagdebate sa mga Testigo

MANILA, Pilipinas — Pinuna ni Atty. Claire Castro, ang Press Officer ng Palasyo, ang ilang senator-judge sa impeachment trial ni Bise Presidente Sara Duterte na tila kumikilos bilang abogado ng depensa sa halip na bilang mga tagapagtanong para sa mga paglilinaw.

Ayon kay Castro, sa mga pagdinig ay makikita ang mga proseso at batas na dapat sundin, ngunit may mga senator-judge na nililihis ang interpretasyon at hindi pinapayagan ang mga testigo na tapusin ang kanilang mga sagot.

“Bilang isang trial lawyer, ang tungkulin ng judge ay magtanong para sa mga paglilinaw, hindi upang mag-cross examine ng testigo,” pahayag ni Castro.

Dagdag pa niya, hindi nararapat na makipagtalo ang senator-judge sa mga testigo dahil ang kanilang mandato ay alamin ang katotohanan para sa kapakanan ng taumbayan, at hindi upang itago ang mga iregularidad.

“Ang kanilang responsibilidad ay ilabas ang mga impormasyon na dapat malaman ng publiko, hindi ang baligtarin ang batas upang itago ang mga kalokohan ng iba,” aniya.

Hindi tinukoy ni Castro ang mga senator-judge na kanyang tinutukoy, ngunit iginiit niya na makikita naman sa mga pagdinig kung sino ang aktwal na nagko-cross examine.

Bilang halimbawa, binanggit niya ang isang pahayag mula sa isang senator-judge na tila biased, na nagsasabing ang School Division Office (SDO) lamang ang dapat managot, kahit na mayroong ibang ahensya na dapat ding mananagot.