Castro: Senador Imee Marcos, may layuning iligtas si VP Duterte sa impeachment

MANILA, Pilipinas — Pinuna ni Undersecretary Claire Castro ng Presidential Communications Office (PCO) ang Senator-Judge na si Imee Marcos dahil sa kanyang estilo ng pagtatanong sa mga testigo sa impeachment trial ni Bise Presidente Sara Duterte.

Sa isang press briefing sa Malacañang, sinabi ni Castro na bagama’t may karapatan ang senador na magtanong bilang hukom, tila ang mga tanong nito ay nakatuon sa pagligtas kay Duterte mula sa mga akusasyon na may kaugnayan sa paggamit ng confidential funds.

Ayon kay Castro, ang mga tanong ni Marcos ay nagpapakita na hindi nahawakan ni Duterte ang mga pondo at hindi siya direktang kasangkot sa pagbuo ng mga dokumento na may kinalaman sa mga ito.

Gayunpaman, iginiit ni Castro na mahalagang isaalang-alang ang pahayag ng isang testigo na nag-utos si Vice President Sara Duterte na ibigay ang buong P125 milyon na confidential funds sa kanyang security officer na si Col. Raymund Dante Lachica.

“Ibig sabihin nito, ang may kontrol at utos ay walang iba kundi si VP Sara. Kaya hindi na kinakailangan na makita ng SDO kung siya mismo ang humawak ng pera,” dagdag pa ni Castro.