Dalawang lalaki, arestado matapos magnakaw ng cellphone sa construction site sa Quezon City

Arestado ang dalawang lalaki matapos mahuli sa CCTV ang kanilang panloloob sa isang construction site sa Barangay Holy Spirit, Quezon City. Ang insidente ay naganap noong Martes ng madaling araw, bandang 4 a.m., ayon sa ulat ni James Agustin sa GTV News Balitanghali.

Sa video, makikita ang isang lalaki na dahan-dahang umaakyat sa pader ng construction site, sinundan ng isa pang lalaki. Pagkapasok nila, agad nilang pinuntirya ang mga cellphone ng mga construction worker na natutulog sa kanilang barracks. Ang isa sa mga lalaki ay nagsilbing lookout habang ang isa naman ay naghanap ng mga cellphone.

Nakuha ng mga suspek ang tatlong cellphone na nagkakahalaga ng P25,000. Ayon kay Police Lieutenant Colonel Wilfredo Fabros Jr., nagising ang isa sa mga biktima at napansin na wala na ang kanyang cellphone. Sa kanyang paghanap, nakita na lamang niya ang charger nito, kaya't ginising niya ang kanyang mga kasama na nagulat din nang malaman na wala na rin ang kanilang mga cellphone.

Matapos ang insidente, agad na dumulog ang mga construction worker sa kanilang supervisor. Nang suriin ang kuha ng CCTV camera, nakumpirma na may pumasok na magnanakaw sa kanilang barracks. Kalaunan, nadakip ang mga suspek na 20-anyos at 16-anyos na lookout.

Ayon kay Fabros, nakilala ng isang witness ang isa sa mga suspek dahil sa tattoo nito sa leeg, na siya ring kapitbahay ng witness. Kasama ang mga awtoridad, pinuntahan ang bahay ng suspek at doon naituro ang lokasyon ng menor de edad na nahuli rin.

Sinampahan ng reklamong robbery ang dalawang suspek, ngunit hindi na nabawi ang mga cellphone na naibenta na umano sa halagang P6,500. Itinurn-over ng pulisya ang menor de edad sa Social Services Development Department para sa kanilang interbensyon, ayon kay Fabros.