Dalawang Suspek, Arestado sa P480K na Droga sa Bulacan

BULACAN, Pilipinas – Nahuli ang dalawang lalaki, kabilang ang isang itinuturing na High-Value Individual (HVI), sa isang buy-bust operation na isinagawa ng pulisya sa San Jose Del Monte (SJDM) noong Setyembre 28. Ayon sa ulat ni PLTCOL Nelson Sardin, ang Acting Chief of Police ng SJDM, ang mga suspek ay kinilala sa mga alyas na 'Moymoy', 28, at 'Buntot', 27.

Ang operasyon ay isinagawa ng City Drug Enforcement Unit bandang 10:10 ng gabi sa Barangay Bagong Buhay 1. Nabatid na nahuli ang mga suspek matapos magbenta ng isang zip-lock na plastic na naglalaman ng hinihinalang tuyong dahon ng marijuana sa mga undercover na pulis na nagbigay ng P500 bilang marked money.

Sa isinagawang protective search, nakuha mula sa mga suspek ang buy-bust money, tatlong bricks na nakabalot sa plastic, isang self-sealing knot-tie plastic, at isang zip-lock na naglalaman ng hinihinalang marijuana na may kabuuang timbang na 4 kilos. Ang halaga ng mga nakumpiskang droga ay tinatayang P480,000.

Ang mga suspek at ang mga ebidensya ay dinala sa istasyon ng pulisya para sa tamang dokumentasyon at disposisyon. Kasalukuyan nang inihahanda ang mga kaso laban sa kanila. (Dick Mirasol III)