Eala umani ng respeto sa world stage

MANILA, Philippines — Dahil sa tagumpay ni Alex Eala sa Wimbledon Championships, mas lalong lumalim ang respeto ng buong mundo sa kanya, partikular na mula sa mga kilalang personalidad hindi lamang sa tennis kundi maging sa entertainment industry. Bagama’t hindi nasungkit ni Eala ang kampeonato, marami ang humanga sa husay at galing nito, gayundin sa magandang kuwento nito kung paano ito nagsimula sa tennis.

Tinukoy pa ito ng karamihan na ‘inspiring story’ na magsisilbing inspirasyon ng mga kabataang tennis players hindi lamang sa Pilipinas kundi maging sa iba’t ibang panig ng mundo. Ilan sa mga kilalang personalidad na tunay na humanga kay Eala sina tennis legends Billie Jean King at Martina Navratilova na may kani-kanyang magandang opinyon para sa Pinay netter.

“She is the first Filipino to reach the Round of 16. Such an inspiration for kids in the Philippines and all over the world. Keep going for it, Alex,” ani King sa kanyang post sa social media. Sa kabilang banda, kasama si Eala sa listahan ni Navratilova sa mga paborito nitong panoorin dahil sa potensiyal nito.

Bukod pa rito, ang suporta ng mga Pinoy fans na patuloy na dumadagsa sa mga venues para suportahan ang bawat laban nito ay hindi maikakaila. “Alex Eala, she is building a whole new craze in Southeast Asia and the Philippines. Bringing more fans into tennis,” ani Navratilova.

Mas lalo pang umingay ang pangalan ni Eala nang gulantangin nito si 2025 Wimbledon champion Iga Swiatek sa third round sa pamamagitan ng 7-6 (9), 6-2 panalo. Ilan sa mga kilalang personalidad na nanood sa laban sina dating Grand Slam champion Roger Federer at Andrew Garfield, na bumida sa blockbuster movie na Spiderman.

Namangha si Garfield sa ibinahaging kuwento ni Eala sa kanyang post match interview na tinukoy ng Hollywood star bilang ‘inspiring.’ Nagkomento naman si Sharapova kay Eala sa isang post kung saan sinabi nitong ‘a star’ ang Pinay netter.

Nagsisimula pa lamang si Eala sa kanyang professional tennis career at inaasahang makakamit din nito ang inaasam na Grand Slam title — ngayong taon, sa susunod na taon o kung kailan man ito dalhin ng tadhana.