Estudyanteng Grade 7, nasugatan matapos umanong paluin ng guro sa Bacolod City

Sugatan ang isang estudyanteng lalaki sa ikapitong baitang matapos umanong paluin ng patpat ng kanyang guro sa loob ng silid-aralan sa Bacolod City. Ayon sa ulat ni Aileen Pedroso sa GMA Regional TV Ratsada Balita, nagtamo ang biktima ng mga sugat sa kanyang braso, likod, at tagiliran.

Batay sa paunang impormasyon, nagalit ang guro matapos siyang matamaan ng clay na inihagis ng estudyante sa kanyang mga kaklase noong Miyerkules. Ang insidente ay ini-report na ng mga magulang ng bata sa pulisya.

Sa kasalukuyan, tumanggi ang pamunuan ng paaralan na magbigay ng pahayag hinggil sa insidente. Samantala, hindi muna pinapayagang pumasok sa trabaho ang guro habang isinasagawa ng Department of Education-Bacolod City ang kanilang imbestigasyon.