Heart, ayaw paawat!

MANILA, Philippines — Umangat na naman si Heart Evangelista sa international fashion scene matapos manguna sa ibang mga celebrity at fashion influencer na dumalo sa Paris Haute Couture Week Fall/Winter 2026–2027. Ayon sa data analytics firm na Launchmetrics, si Heart ang No. 1 celebrity voice mula sa Pilipinas sa prestigious fashion event na ginanap sa Paris mula July 6 hanggang July 9.

Batay sa pagsusuri ng Launchmetrics sa mga content na inilabas mula July 4-16, umabot sa $7.5 milyon ang Media Impact Value o MIV na nalikha ng mga post ni Heart kaugnay ng Haute Couture Week. Ang naturang halaga ay kumakatawan sa mahigit 96% ng kabuuang $7.8 milyong MIV na naitala ng Pilipinas.

“For the Celebrity Voice, the Philippines ranked 1st position thanks to actress Heart Evangelista, whose content alone ($7.5 million) accounted for over 96% of the MIV generated by the country ($7.8 million),” pahayag ng Launchmetrics. Ang MIV ay sukatan ng katumbas na halaga ng publicity at exposure na nalilikha mula sa mga social media post, online article, mention, interaction at iba pang content tungkol sa isang celebrity, influencer, brand, o fashion event.

Isinasaalang-alang dito ang reach at engagement ng bawat post, pati na rin ang epekto nito sa mga fashion house at brand na itinatampok ng celebrity o influencer. Sa kabuuan, nakalikha ang Paris Haute Couture Week Fall/Winter 2026–2027 ng $239.7 milyong MIV mula sa humigit-kumulang 37,200 placements.

Kapansin-pansin din ang naging puwesto ni Heart sa overall ranking. Pumangalawa lamang siya sa Vogue France, at nalampasan pa ang luxury fashion house na Dior. Nanguna ang Vogue France na may $13.6 milyong MIV, sinundan ni Heart na may $7.5 milyon. Nasa ikatlong puwesto naman ang Dior na may $6.1 milyon.

Pumang-apat ang Sayidaty na may $4.2 milyon, habang nasa ikalimang puwesto ang Gala na may $3.3 milyon. Sa limang nanguna sa listahan, si Heart lamang ang natatanging individual celebrity at influencer, ang iba ay mga kilalang fashion brand at media publication.

Kamakailan lamang, iniulat din na lumampas na sa 100 milyon ang pinagsama-samang views ng mga social media video ni Heart mula sa kanyang Paris fashion week appearances. Para sa kanyang mga tagahanga, patunay ang mga numerong ito na patuloy na inaabangan ng publiko ang fashion content ni Heart, lalo na ’pag dumadalo siya sa malalaking fashion event sa Europe.

Bukod sa glamorous outfits, kinagigiliwan din ng followers ang behind-the-scenes video, fashion tips at updates tungkol sa pinakabagong trends na ibinabahagi ng artist-entrepreneur. Ayon pa sa fans, kabilang si Heart sa “chosen few” dahil regular siyang naiimbitahan sa mga exclusive event na dinadaluhan ng mga international celebrity, fashion editor, designer at global style icon.

Hindi lang sa fashion abala si Heart. Bukod sa pagiging global influencer at artist-entrepreneur, abala rin siya sa pagdidisenyo ng mga alahas tampok ang iba’t ibang gemstones.