Ikalawang Pinoy seafarer, nasawi sa pag-atake sa Black Sea

MANILA, Philippines – Kinumpirma ni Hans Cacdac, ang kalihim ng Migrant Workers, ang pagkamatay ng ikatlong Pilipinong seafarer na biktima ng pag-atake sa hilagang bahagi ng Black Sea. Ayon kay Cacdac, noong nakaraang linggo, dalawa na ang nasawi, at ngayon ay may isa pang nadagdag sa bilang ng mga biktima. "Tatlo na po ang nasawi natin sa mga pag-atake sa mga barko na nakadock sa mga pantalan ng Ukraine," pahayag ni Cacdac noong Sabado, Agosto 1.

Bagamat hindi binanggit ni Cacdac ang pangalan ng biktima o ang tiyak na lokasyon ng insidente, inihayag niya na siya ay lilipad patungong Romania sa darating na Agosto 3 upang bisitahin ang morgue kung saan nakalagak ang labi ng nasawing seafarer. Tiniyak din ng administrasyon ni Pangulong Ferdinand Marcos Jr. ang kanilang buong suporta at tulong para sa pamilya ng biktima.

Sa kasalukuyan, iniulat ni Cacdac na mayroong 236 na Pilipinong seafarer sa 17 barkong inatake sa nasabing lugar. Sa mga ito, 217 ang ligtas, habang 15 naman ang nasugatan. Sa kabuuan, 39 na seafarer ang nakauwi na sa bansa, kasama na ang siyam na nasugatan.

Dahil sa mataas na antas ng panganib sa lugar, iginiit ni Cacdac na kinakailangan munang itigil ang pagpapadala ng mga Pilipinong seafarer sa nasabing bahagi ng Black Sea. Nakikipag-ugnayan na ang ahensya sa Department of Foreign Affairs, mga may-ari ng barko, at mga ahensya ng manning para sa pag-aayos ng pagbibiyahe ng mga labi ng tatlong nasawing seafarer. RNT/JGC