KayaFlix: Bagong Plataporma para sa mga Kwentong Pinoy

Inilunsad ang KayaFlix, isang bagong streaming app na nakatuon sa mga orihinal na kwentong Pilipino, sa isang event na ginanap sa SinePop sa Cubao, Quezon City. Pinangunahan ito ni Maki Javier, ang creative at managing director ng KayaFlix, na nagbigay-diin sa layunin ng app na maging tahanan ng iba't ibang kwentong Pilipino, mula sa mga kumplikado hanggang sa mga simpleng naratibo.

Ayon kay Direk Maki, ang KayaFlix ay naglalayong maging launchpad para sa mga estudyanteng filmmaker at mga baguhang direktor na naghahanap ng plataporma para ipakita ang kanilang mga likha. Ang ideya ng KayaFlix ay nagmula sa kanyang karanasan bilang hurado sa isang student film festival sa Bulacan State University, kung saan siya ay na-inspire sa mga kwentong ipinakita ng mga estudyante. "Sayang naman kung hanggang festival lamang mapapanood ang mga kwentong ito. KayaFlix was built to become that home," pahayag niya.

Sa kasalukuyan, ang web version ng KayaFlix ay bukas na para sa mga subscriber sa halagang P199 kada buwan. Bilang bahagi ng kanilang promotional offer, nagbigay ang KayaFlix ng libreng limang episodes sa mga bagong subscriber. Inaasahan din ni Direk Maki na sa Agosto ay magiging available na ang KayaFlix sa mga iOS at Android na telepono.

“Patuloy na nagbabago ang teknolohiya sa paraan ng ating panonood, ngunit hindi dapat nito baguhin ang puso ng kwentong Pilipino. Layunin naming mapanatili ang diwa ng kwentong ito habang inihahain ito sa format na natural na tinatanggap ng mga makabagong manonood,” dagdag pa niya. Ang KayaFlix ay naglalayong bigyang-diin ang kahalagahan ng storytelling sa kulturang Pilipino, na umaasa na makapagbigay ng mas maraming pagkakataon para sa mga kwentong dapat ipakita sa mas malawak na audience.