Lalaki, 26, nalunod sa talon sa Sablan, Benguet

Isang 26-taong gulang na lalaki ang nalunod habang naliligo kasama ang mga kaibigan sa isang talon sa Sablan, Benguet. Ayon sa ulat ng GMA Regional TV One North Central Luzon, naganap ang insidente sa Towing Falls sa Barangay Poblacion noong umaga ng Biyernes.

Sinabihan ang mga kasama ng biktima, na nakatira sa Asin Road sa Baguio City, na huwag lumangoy sa malalim na bahagi ng talon. Nang hindi na nila makita ang biktima, agad nilang iniulat ito sa mga awtoridad.

Matapos ang isang oras ng paghahanap, natagpuan ng search and rescue team ang mga labi ng biktima. Dahil sa insidente, pansamantalang isinara ang Towing Falls sa publiko. Ang GMA RTV ay nakikipag-ugnayan sa pamilya ng biktima upang makakuha ng pahayag. —GMA Regional TV News