Makulay na Pagbabago ng Kindle, Kasama ang Bagong Ube Variant

Inilunsad ng Amazon ang bagong disenyo ng kanilang Kindle lineup, na ngayon ay may makulay na variant na Ube. Ang mga modelo ng Kindle, Kindle Paperwhite, at Kindle Colorsoft ay nakatanggap ng pagbabago sa kanilang disenyo, na nagresulta sa mas payat na anyo, pinabuting display, at mga bagong kulay. Ang mga bagong kulay ay kinabibilangan ng Ube, Alpine Sky, Seaglass Green, Graphite, at Fig, na nakadepende sa partikular na modelo.

Ang bagong anim na pulgadang Kindle ay ang pinakamaliit at pinakamagaan sa lineup. Ito ay may kapasidad na 16GB ng imbakan, maaaring tumagal ng hanggang anim na linggong buhay ng baterya, at nagbubukas ng mga libro nang hanggang 30% na mas mabilis kumpara sa nakaraang bersyon. Ang presyo nito ay nagsisimula sa $149.99 (humigit-kumulang P9,380). Para sa mga nais ng mas premium na finish, mayroong bersyon na may aluminum na likod, 32GB ng imbakan, at matte finish, na nagsisimula sa $189.99 (humigit-kumulang P11,880).

Ang Kindle Paperwhite ay nakatanggap din ng mas payat at magaan na disenyo habang pinanatili ang mga tampok tulad ng waterproof na konstruksyon at adjustable warm light. Ang baterya nito ay maaaring tumagal ng hanggang 12 linggo, at ang pinabuting display ay dinisenyo upang magbigay ng mas malalim na itim at mas malinaw na teksto. Ang 16GB na bersyon ng Paperwhite ay nagsisimula sa $199.99 (humigit-kumulang P12,500) sa kulay Graphite. Ang Paperwhite Signature Edition ay may 32GB ng imbakan, aluminum rear housing, auto-adjusting front light, wireless charging, at double-tap page-turn feature. Nagsisimula ito sa $249.99 (humigit-kumulang P15,630) at available sa Graphite at Seaglass Green.

Samantala, ang Kindle Colorsoft, na kilala bilang color e-reader ng Amazon, ay nakatanggap din ng bagong disenyo ng display. Layunin nitong magbigay ng mas natural na karanasan sa kulay para sa mga nilalaman tulad ng mga pabalat ng libro, komiks, graphic novels, at travel guides. Ang 16GB na Colorsoft ay available sa Graphite, na nagsisimula sa $289.99 (humigit-kumulang P18,140). Ang Colorsoft Signature Edition naman ay may 32GB ng imbakan, aluminum housing, auto-adjusting front light, double-tap page turning, at suporta para sa charging dock. Nagsisimula ito sa $319.99 (humigit-kumulang P20,000).

Ang mga bagong bersyon ng Kindle, Kindle Paperwhite, at Kindle Colorsoft ay mayroon ding Kids editions. Ang mga ito ay may mga kid-friendly na cover at 12 buwan ng Amazon Kids+, na nagbibigay ng access sa libu-libong mga libro at audiobooks. Ang Kids Kindle lineup ay nagsisimula sa $179.99 (P11,260).

Bilang karagdagan, nagpakilala ang Amazon ng mga accessories para sa kanilang mga bagong Kindle devices, kabilang ang $34.99 (humigit-kumulang P2,190) Kindle Click, isang Bluetooth remote para sa pag-turn ng mga pahina, at $79.99 (humigit-kumulang P5,000) Page-Turn Covers na may pisikal na mga button para sa pag-turn ng pahina. Mayroon ding $59.99 (humigit-kumulang P3,750) Charging Dock para sa mga compatible na Paperwhite Signature Edition at Colorsoft Signature Edition devices, habang ang mga Kindle covers ay nagsisimula sa $39.99 (humigit-kumulang P2,500).

Ang mga bagong disenyo ng Kindle at aluminum Kindle ay available na sa ilang mga merkado, kabilang ang US, Canada, Japan, Australia, at ilang mga bansa sa Europa at Gitnang Silangan. Ang mga bagong disenyo ng Kindle Paperwhite at Kindle Colorsoft ay maaari ring i-preorder sa mga rehiyon na ito. Sa kasalukuyan, hindi pa inihahayag ng Amazon ang availability nito para sa Pilipinas. —Carby Rose Basina/JCB GMA News