MTRCB, nagbigay ng babala laban sa pekeng permit ng ‘Tatsulok Trilogy’

Nagbigay ng matinding babala ang Movie and Television Review and Classification Board (MTRCB) kaugnay sa paggamit ng mga pekeng permit, matapos matuklasan ang isang pekeng Permit to Exhibit (PTE) na konektado sa Tanajuan Pelikula Production at sa pelikulang "Tatsulok Trilogy."

Sa opisyal na pahayag ng MTRCB na inilabas noong Agosto 27, 2026, inihayag na ang nasabing pelikula ay hindi dumaan sa proseso ng pagsusuri at klasipikasyon ng ahensya at wala itong wastong PTE. Idinagdag din na hindi rehistrado ang Tanajuan Pelikula Production sa MTRCB.

Ayon sa mga ulat, natuklasan ang pekeng permit noong Agosto 21, 2026, sa araw ng premiere ng pelikula. Napansin ni MTRCB Board Member Ma. Cecilia Villarosa na nakalista ang kanyang pangalan bilang isa sa mga nag-review ng pelikula, na agad niyang pinansin dahil hindi naman siya ang nag-review nito, ayon sa ahensya.