Muntinlupa Mayor Ruffy Biazon, tumulong sa mga OFW na biktima ng human trafficking sa Thailand

Nakikipag-ugnayan ang tanggapan ni Muntinlupa Mayor Ruffy Biazon sa mga ahensiya ng gobyerno upang iligtas ang ilang overseas Filipino workers (OFWs), kabilang ang isang taga-Muntinlupa, na sinasabing biktima ng pagmamaltrato at pang-aabuso sa Thailand. Sa isang post sa Facebook, ibinahagi ng alkalde na nakarating sa kanyang kaalaman ang isang video ng isang OFW na humihingi ng tulong upang makauwi sa Pilipinas, na sinasabing biktima rin ng human trafficking.

Ayon sa pahayag ni Biazon, ang mga migrant workers ay sapilitang pinagtatrabaho ng higit 18 hanggang 20 oras bawat araw, at walang sapat na pagkain at sahod. Mayroon ding mga alegasyon ng pisikal at sexual na pang-aabuso na naganap sa kanila. Bilang tugon, nagbigay si Biazon ng utos sa Public Employment Service Office (PESO) upang makipag-ugnayan sa pamilya ng OFW.

Inilapit din ni Biazon ang kaso sa Department of Migrant Workers (DMW) para sa agarang interbensyon. Kasalukuyan nang nakikipag-ugnayan ang Migrant Workers Office sa Bangkok, Thailand, sa nabanggit na OFW at sa kanyang pamilya. Patuloy ang kanilang koordinasyon at pagproseso ng mga operasyon para sa pagsagip sa mga biktima.

“Patuloy naming imomonitor ang sitwasyon. Magpapatuloy din ang aming koordinasyon sa DMW hanggang sa siya ay ligtas na makauwi,” ang pahayag ni Biazon, na nagbigay ng katiyakan sa mga pamilya ng mga biktima.