NTF-WPS, kinondena pambobomba ng water cannon ng CCG sa PCG, BFAR

Mariing kinondena ng National Task Force for the West Philippine Sea (NTF-WPS) ang pambobomba ng China Coast Guard (CCG) sa Philippine Coast Guard (PCG) at Bureau of Fisheries and Aquatic Resources (BFAR) habang isinasagawa ang Kadiwa ng Bagong Bayaning Mangingisda mission malapit sa Bajo de Masinloc (BDM) noong Biyernes, Hulyo 24. Sa isang pahayag na inilabas ng NTF-WPS, iginiit nilang naaayon sa batas ang misyong kanilang ikinakasa sa katubigan, na layong tulungan ang mga Pilipinong mangingisda.

Ayon sa NTF-WPS, ang mga barkong ito ay nagsasagawa ng lehitimong serbisyo publiko upang matiyak na ang mga Pilipinong mangingisda ay makakapag-ehersisyo ng kanilang tradisyonal na karapatan sa pangingisda sa BDM, na kinikilala sa ilalim ng internasyonal na batas at pinagtibay ng 2016 South China Sea Arbitral Award. Anila, sa halip na makatanggap ng suporta, sila ay sinalubong ng mga water cannon at mapanganib na mga maniobra na naglagay sa buhay ng mga tao sa panganib at nagbanta sa ligtas na pag-navigate.

Idinagdag pa ng task force na ang Arbitral Award ay pinal at may legal na bisa. Ito ay nagpasawalang-bisa sa malawak na maritime claim ng Tsina dahil wala itong batayan sa internasyonal na batas, kabilang ang 1982 United Nations Convention on the Law of the Sea, at pinagtibay ang tradisyonal na karapatan ng mga Pilipinong mangingisda sa BDM. Anila, walang puwersa sa dagat mula sa mga barkong Tsino ang makakapagpabago sa isang binding ruling o makakalikha ng mga karapatan na hindi kinikilala ng internasyonal na batas.

Ipinahayag ng NTF-WPS na ipagpapatuloy nila ang kanilang mga misyon para sa mga Pilipinong mangingisda sa nasabing katubigan. Kasabay nito, nanawagan sila sa CCG na itigil na ang mga mapanganib na aksyon at sundin ang mga nakasaad sa batas. "Ang NTF-WPS, sa pagsasagawa ng kanyang mandato, ay patuloy na susuporta sa mga operasyon sa WPS na nagpoprotekta sa mga Pilipinong mangingisda, nagpapanatili ng soberanya ng Pilipinas, mga karapatan at hurisdiksyon, at ipinatutupad ang 2016 Arbitral Award sa isang responsable, propesyonal, at mapayapang paraan," ayon sa task force.

Nanawagan ang NTF-WPS sa CCG na itigil ang kanilang mapanganib at ilegal na mga aksyon, sumunod sa mga obligasyon ng Tsina sa ilalim ng UNCLOS, at igalang ang 2016 Arbitral Award. "Ang NTF-WPS ay matatag na nakatayo sa pagpapanatili ng soberanya ng Pilipinas, mga karapatan, at hurisdiksyon sa WPS. Ang mga barkong Pilipino sa BDM at sa mga nakapaligid na tubig ng EEZ ng Pilipinas ay nananatiling nasa lugar at ang kanilang lehitimong misyon ay nagpapatuloy," pagtatapos ng NTF-WPS.

Hindi pa man nakalilipas ang isang linggo, matatandaang inatake rin kamakailan ng CCG ang ilang tauhan ng Philippine Navy (PN) sa Ayungin Shoal, kung saan isa ang nasugatan sa ulo.