Pagsusuri sa Extradition Request ng US para kay Quiboloy, Patuloy

MANILA, Philippines — Patuloy na sinisiyasat ng Department of Justice (DOJ) ang mga dokumento na may kaugnayan sa extradition request ng Estados Unidos para kay Pastor Apollo Quiboloy.

Ito ang pahayag ni Undersecretary Claire Castro, ang Press officer ng Palasyo, nang tanungin kung mayroon nang desisyon si Pangulong Ferdinand Marcos Jr. hinggil sa hiling na extradition ng Estados Unidos kay Quiboloy.

Ayon kay Castro, hindi pa natatapos ng DOJ ang pagsusuri sa mga dokumentong ipinasa sa kanila. Kabilang sa kanilang sinisiyasat ay ang pagkakakilanlan ni Quiboloy, kung siya nga ba ang hinihiling na ma-extradite.

Tinitingnan din ng ahensya kung mayroong double criminality, o kung ang mga kasong kinakaharap ni Quiboloy sa US ay kapareho rin ng mga krimen na may parusa sa Pilipinas.

Nauna nang sinabi ng Palasyo na inaasahang malalaman ang desisyon ng Pangulo sa extradition request sa loob ng ilang linggo, matapos itong dumaan sa tamang proseso ayon sa batas.