Pinaigting na Kampanya ng DTI para sa Mas Mapanuri at Ligtas na Mamimili

MANILA, Philippines – Pinaigting ng Department of Trade and Industry (DTI) ang kanilang kampanya upang higit pang mapalawak ang kaalaman ng mga mamimili sa ilalim ng pamumuno ni Secretary Ma. Cristina Roque. Ayon kay Claire Castro, Undersecretary ng Presidential Communications Office, ang hakbang na ito ay alinsunod sa utos ni Pangulong Ferdinand R. Marcos Jr. na layuning palakasin ang kaalaman ng mga mamimili hinggil sa kanilang mga karapatan at ang kahalagahan ng pagpili ng mga ligtas at dekalidad na produkto.

Bilang bahagi ng Consumer Welfare Month 2026, na may temang “Safe Products, Confident Consumers,” inaanyayahan ng DTI ang publiko na makilahok sa mga nakatakdang aktibidad ngayong buwan ng Oktubre. Kabilang sa mga ito ang isang Consumer Fun Run na gaganapin sa Marikina Complex sa darating na linggo, at isang Konsyumer Assembly sa mga barangay sa Metro Manila na naglalayong magbigay ng praktikal na kaalaman tungkol sa mga karapatan at responsibilidad ng mga mamimili.

Magsasagawa rin ang DTI ng Certified Products Expo sa SM Megamall mula Oktubre 13 hanggang 15, kung saan ipapakita ang mga sertipikadong produkto at ituturo kung paano ma-verify ang kanilang pagiging lehitimo. Kasama rin sa mga aktibidad ang National Standards Week na naglalayong ipakita ang kahalagahan ng pagsunod sa mga pamantayan para sa kaligtasan ng mga mamimili, pati na rin ang Bagwis Awards at Seal of Legitimacy na kumikilala sa mga negosyong sumusunod sa mga kinakailangan.

Isasagawa rin ang Consumer Advocacy Making Challenge, kung saan maaaring lumikha ng mga maiikling video tungkol sa kaligtasan ng produkto at mga karapatan ng mamimili. Kasabay nito, ang mga regional at provincial offices ng DTI ay magsasagawa ng mga lokal na seminar, community activities, at youth programs, pati na rin ang mas masusing pagbabantay sa mga pamilihan.

Sa kabuuan, ang mga aktibidad na ito ay patunay ng seryosong layunin ng administrasyon na itaguyod ang kaligtasan, kalidad, at tamang pagpili ng mga produkto. Inaanyayahan ang lahat na bisitahin ang opisyal na website ng DTI o ang kanilang Consumer Care Facebook page para sa karagdagang impormasyon. Sa ilalim ng programang ito, layunin ng DTI na maging mas responsable at kumpiyansa ang mga mamimili sa bagong Pilipinas. (KRIS JOSE)