Pitong Finalista ng Reina Filipinas 2026, Inanunsyo na

Patuloy na umiinit ang kompetisyon sa Reina Filipinas 2026 habang umabot na sa pitong finalist ang labanan! Inanunsyo ang limang beauty queens bilang Top 5, habang ang dalawa naman ay kinilala bilang mga Fast Track winners.

Narito ang pitong beauty queens na umusad sa susunod na yugto ng kompetisyon.

Bago ang anunsyo ng Top 7 finalists, isinagawa ang Voice for Change speech round kung saan bawat isa sa 11 kandidata ay nagbigay ng 30-segundong talumpati tungkol sa paksang, "Pagprotekta at pagpapanatili ng kapayapaan sa komunidad ng pageant."

Naganap din ang long gown competition, kung saan si Alexie Caimoso Brooks mula sa Iloilo City ang nagwagi ng Best in Long Gown.

Sa kasalukuyan, ginaganap ang kauna-unahang coronation night ng Reina Filipinas 2026 sa Newport Performing Arts Theater sa Pasay City. Isang reyna ang koronahan bilang Reina Filipinas - Grand International 2026, habang dalawa ang magiging Reina Filipinas - MGI All Stars.

Ang tatlong nagwagi ay magiging kinatawan ng Pilipinas sa mga pageant na Miss Grand International at Miss Grand International All Stars.

Pinangunahan ang Reina Filipinas ni Jojo Bragais, na kilala bilang tagapagtatag ng Jojo Bragais Shoes, isang brand na malawakang ginagamit sa mga pangunahing lokal at internasyonal na pageants.

Si Miss Grand International 2025 Emma Tiglao ang nagsisilbing national director ng pageant.