Sadistang colonel inireklamo ng lover na lady cop

CAMP VICENTE LIM, Laguna, Philippines — Isang Colonel na dating provincial director sa Calabarzon region ang nahaharap sa mga administratibong reklamo sa National Police Commission (Napolcom) Central Office dahil sa umano’y pambubugbog at sekswal na pang-aabuso nito sa karelasyong babaeng kapwa pulis.

Pansamantalang itinago ang pagkakakilanlan ng police official dahil sa nakabinbin na presidential clearance mula sa Palasyo ng Malacañang, na kinakailangan dahil sa kanyang ranggo bilang isang police colonel at siya ay nasa ilalim ng presidential appointee.

Ang mga kasong administratibo para sa umano’y grave misconduct, abuse of authority at conduct unbecoming of a police officer ay isinampa ng babaeng policewoman na iniulat na matagal nang lover ng akusado sa tanggapan ng Napolcom-Central office sa Quezon City.

Sa reklamo, inilarawan ng lady cop na siya ay binubugbog, sekswal na inaabuso, at sapilitang pinagagawa ng mga sexual performance. Sa kanilang video calls, siya ay pinapa-hubo’t hubad at kinukunan ng larawan ng nasabing manyakis na colonel.

Itinago ang pagkakakilanlan ng nagrereklamo dahil sa sensitivity ng kaso sa ilalim ng Anti-violence Against Women and their Children Act of 2004 (VAWC).

Ang akusado na pulis ay dating provincial director sa Calabarzon region, naging hepe ng pulisya sa Rizal province, at ngayo’y namumuno ng isa sa mga units o departamento sa Calabarzon police headquarters.

Ayon sa imbestigador, kapag nalilipat o nare-reassign ang colonel sa ibang police units, dinadala umano niya ang lover na policewoman bilang personal staff. Sa paglipas ng panahon, lumala ang kanilang relasyon dahil sa umano’y pang-aabuso na dinaranas ng lady cop.