Sen. Raffy Tulfo, nagbigay-diin sa mga isyu ng palakasan sa pabahay ng gobyerno

MANILA, Philippines — Nagpahayag ng pagkabahala si Sen. Idol Raffy Tulfo sa mga ulat na natanggap niya tungkol sa talamak na palakasan sa sistema ng pabahay ng gobyerno. Ayon sa kanya, ang mga benepisyaryo ng mga pabahay ay kadalasang mga tao na may koneksyon sa mga lokal na opisyal, tulad ng mga taga-munisipyo at mga 'bata' ng mayor o kapitan.

Sa isang pagdinig ng Senado ukol sa badyet ng Department of Human Settlements and Urban Development (DSHUD) at mga kaakibat na ahensya nito, kabilang ang National Housing Authority (NHA), sinabi ni Sen. Raffy na may mga natanggap siyang impormasyon na ang ilang mga nakatanggap ng pabahay mula sa NHA ay may mga sariling ari-arian o sasakyan. Ang mga ito ay napasama sa listahan ng mga benepisyaryo dahil sa kanilang koneksyon, na nagdudulot ng pag-aalala na ang mga pabahay ng gobyerno ay nagiging gantimpala para sa mga botante ng ilang politiko.

Ipinaliwanag ni Joeben Tai, ang General Manager ng NHA, na ang kanilang batayan sa pagpili ng mga benepisyaryo ay ang listahan na ibinibigay ng mga lokal na pamahalaan o mga ahensya ng gobyerno. Ang mga pabahay ay nakalaan para sa mga proyekto ng resettlement o mga programa para sa mga biktima ng kalamidad.

Dahil dito, iminungkahi ni Sen. Raffy na dapat magkaroon ang NHA ng isang nakalaang yunit para sa masusing pagsusuri ng mga benepisyaryo ng mga programang pabahay ng gobyerno. Ito ay upang hindi lamang umasa sa mga listahang isinusumite ng mga lokal na pamahalaan at upang masiguro na ang mga makatatanggap ng pabahay ay tunay na kwalipikado. Sinang-ayunan ito ni Tai.

Pinaalalahanan din ni Sen. Raffy si Tai na tiyakin na ang mga benepisyaryo ay hindi ipinapasalo, ipinagbibili, o ipinaparenta ang mga housing unit na ibinigay sa kanila. Nangako si Tai na paiigtingin ang monitoring upang maiwasan ang ganitong mga gawain.