Umbagerong mister pina-entrap ni misis

CAVITE, Philippines — Isang mister ang naaresto sa isang entrapment operation na isinagawa ng pulisya matapos itong kikilan ang kanyang dating misis ng halagang P80,000. Ang insidente ay naganap noong nakaraang araw sa Barangay Niog, Bacoor City.

Ayon sa ulat, ang operasyon ay ikinasa ng mga operatiba ng Bacoor Police matapos magreklamo ang dating asawa ng suspek na si alyas “Mae.” Sa kanyang salaysay, sinabi ng biktima na patuloy siyang pinupuntahan ng kanyang dating mister at madalas na sinasaktan. Hinihingan din siya nito ng pera, at sa pinakahuli, kinikilan siya ng P80,000 kapalit ng pangako na hindi na siya bubugbugin.

Dahil dito, humingi ng tulong si Mae sa mga awtoridad na agad namang nagplano para sa entrapment. Nagkasundo ang dalawa na magkita sa isang fastfood chain sa nasabing barangay upang doon ibigay ang hinihinging pera ng suspek.

Nang dumating ang suspek sa fastfood, agad niyang iniabot ang perang hinihingi. Sa pagkakataong iyon, dinakma siya ng mga operatiba at hindi na siya nakapalag nang siya ay posasan.

Mula sa suspek, narekober ang isang pirasong P1,000 na marked money at 79 pirasong boodle money, na ginamit sa operasyon. Ang suspek ay kasalukuyang nasa kustodiya ng mga awtoridad at nahaharap sa kasong extortion.