Walang naiulat na Pilipinong biktima sa pagbaha sa hangganan ng Nepal at Tsina—Malacañang

Nilinaw ng Undersecretary ng Presidential Communications Office (PCO) at Palace Press Officer na si Atty. Claire Castro na walang naitalang Pilipinong biktima sa naganap na flash floods sa hangganan ng Nepal at Tsina, na tumama sa mga komunidad noong Miyerkules, Agosto 26.

Sa isang press briefing na isinagawa ng Palasyo noong Huwebes, Agosto 27, sinabi ni Castro na wala pang impormasyon mula sa Department of Foreign Affairs (DFA) tungkol sa mga posibleng Pilipinong casualties sa nasabing kalamidad.

Ayon sa mga tala ng Overseas Workers Welfare Administration (OWWA) at DFA, mayroong 18 overseas Filipino workers (OFWs) sa Nepal, habang 128 naman ang mga Pilipino sa lugar, karamihan ay mga kababaihang nakapangasawa ng mga lokal na residente.

Samantala, patuloy na nakikipag-ugnayan ang mga lokal na awtoridad sa mga kinauukulan sa Nepal upang matiyak ang kaligtasan ng mga Pilipinong naninirahan sa nasabing bansa.