Will, susubok sa comedy

Muling pakikiligin nina Mika Salamanca at Will Ashley ang kanilang mga tagahanga dahil magkakatambal sila sa bagong serye ng GMA na pinamagatang "Delivery Boi." Ayon kay Will, magiging magaan na lamang ang kanilang trabaho ni Mika sa proyekto. Sa isang panayam sa "24 Oras," sinabi ni Will, "Si Mika sobrang random person. Feeling ko mas magiging madali ‘to kasi isa nga ‘yung kumportable na kami sa isa’t isa. Nagkatrabaho na kami, nagkasama kami sa loob ng bahay (ni Kuya sa Pinoy Big Brother). So magiging madali siya for me."

Ayon naman kay Mika, talagang napahanga siya sa pagiging magaling na aktor ni Will mula pa noong una. "Very professional, Will, nakikita mo talaga sa kanya ‘yung 10 taon. Lagpas na taon niya sa pagtatrabaho sa pagiging artista," paglalarawan ni Mika sa aktor. Ang kanilang bagong proyekto ay isang malaking hakbang para kay Will, dahil ito ang kanyang kauna-unahang pagkakataon na makagawa ng serye na komedya ang tema, na malayo sa kanyang mga nakaraang proyekto na kadalasang puno ng drama.

"Tawag po nila dito tawa-serye. Kaya super light lang talaga nitong series na ‘to. Malayo siya sa mga nagawa ko before na puro iyakan, puro confrontation," pagbabahagi ng binata. Ang bagong karakter na gagampanan ni Mika ay inaasahang magiging kaabang-abang. Ayon sa kanya, "Sa mga past, very umiiyak sila lagi, very sad ‘yung mga character, may pinaglalaban. Here, may pinaglalaban pa rin po ako pero it’s for other people. It’s for the mga nagde-deliver na mga tao. And very masayahin ako dito. As in sobra."

Samantala, puspusan na ang ginagawang paghahanda nina Bianca de Vera at Dustin Yu para sa kanilang concert na pinamagatang "DustBia Love, Actually… A #DustBia Kilig Celebration," na gaganapin sa New Frontier Theater sa darating na Agosto 8. Sinasabing sobrang tutok ng magkatambal sa lahat ng detalye ng kanilang nalalapit na concert. Ayon kay Bianca, "Parang naka-ilang meetings kami. Tapos even after that Dustin and I would call at night. ‘Magandang idea kaya ‘to? Ganito kaya gawin natin.’ Alam mo ‘yung laging naglalaro ‘yung utak namin. Actually, na-appreciate ko and namin na binibigyan nila kami ng freedom because Dustin and I believe that we’re both creative in our own way."

Kailangan umanong pakaabangan ng mga tagahanga ng tambalang DustBia kung ano ang mangyayari sa concert. Isang sorpresa raw ang naghihintay sa mismong gabi ng kanilang show. "’Pag i-announce namin ‘yung surprise namin, ipapa-off namin ‘yung phones nila para walang mag-post. So kailangan nila pumunta sa concert," patikim ni Bianca sa mga tagahanga. Ang mga detalye ng concert ay tiyak na magbibigay ng kasiyahan sa kanilang mga tagasuporta, na sabik na naghihintay sa mga susunod na kaganapan.